21 лютага - Міжнародны дзень роднай мовы

Дата: 22 февраля 2023 в 17:05

109 просмотров

“І ў палацы, і на сцежцы вузкай,
Каб душа магла пачуць душу,
Размаўляй са мной па-беларуску,
Размаўляй па-роднаму, прашу.”

(Марыя Новікава)

Дзень роднай мовы асаблівы для кожнай нацыі, кожнага народа, бо няма народа без мовы, няма мовы без яго носьбіта. І беларусы не выключэнне. Нам у спадчыну засталася мова – жывая і мілагучная, песенная і паэтычная, старажытная і сучасная.

Родная мова шмат не патрабуе. А калі ўжо назваў яе роднай, калі лічыш яе такой для сябе – павінен жа быць перад ёй хоць нейкі абавязак! Ці хоць часам пра яе думай. Ведайце, сёння беларуская мова стала элітарнай, бо на ёй размаўляюць высокаадукаваныя людзі: літаратары, мастакі, некаторыя дзеячы навукі.

Калі ты чуеш яе – ці то сучасную літаратурную, ці змешаную “трасянку”або мясцовую дыялектную – ведай, што гэта ўсё яна – наша беларуская мова. Не адварочвайся, а прымі яе, бо яе месца ў тваёй краіне. Нашы бацькі, дзяды і прадзеды нямала зрабілі, каб беларуская мова была прызнана як роўная сярод іншых моў свету.

Міжнародны Дзень Роднай мовы адзначаецца па ўсім свеце. Школьная бібліятэка падтрымала гэту ініцыятыву. Гэты дзень у школьнай бібліятэцы (загадчык Алена Пятроўна Сувалава) прайшоў пад дэвізам “Рускай мове дай разгрузку: размаўляй па-беларуску”.

Была агранізавана кніжная выстава “Адкрый для сябе беларускую кнігу”, на якой былі прадстаўлены мастацкія творы беларускіх аўтараў. Чытачы бібліятэкі мелі магчымасць пазнаеміцца з вершамі, апавяданнямі, казкамі Я.Коласа, Я.Купалы, Р.Барадуліна, Н.Галіноўскай і іншых пісьменнікаў.

Зроблена выстава-гульня “Пагавары са мной на мове…”, каля яе праводзіліся розныя літаратурныя гульні. Напрыклад : “Складзі казку”, “Ланцужок беларускіх слоў”, “Разгадай крыжаванку”, ”Знайдзі кветачку” і іншыя.

Вучні 4 “Б” класа сталі ўдзельнікамі гадзіны беларускамоўя “Дзень роднай мовы”. Бібліятэкар зрабіла кароткае паведамленне аб роднай мове. Яна запрасіла паспрабаваць гадзіну размаўляць па-беларуску.

Дзяўчынкі і хлопчыкі з захапленнем спаборнічалі ў веданні беларускай мовы: выконвалі цікавыя заданні, адгадвалі загадкі, перакладалі словы з рускай мовы на беларускую, успаміналі народныя беларускія казкі, чыталі вершы.

Усе добра папрацавалі і справіліся з заданнямі на выдатна, паказалі веданне беларускай мовы. Алена Пятроўна звярнула ўвагу на тое, што трэба шанаваць сваю мову, свае казкі, звычаі, таму што гэта спадчына дзядоў і вялікі нацыянальны скарб. Завяршылася гадзіна беларускамоўя спевам Дзяржаўнага Гімну Рэспублікі Беларусь.